ການກວດກາ-ຄຸ້ມຄອງ "ລາຄາກໍ່ສ້າງຫົນທາງ ໃຫ້ແທດເໝາະ" ຈະປະຢັດງົບລັດໄດ້ຫຼາຍຕື້ກີບ

 
ຂະແໜງ​ໂຍທາ​ທິ​ການ ແລະ ຂົນສົ່ງ (​ຍທຂ) ຖື​ເປັນ​ຫົວໃຈ​ຫຼັກ ໃນ​ການຈັດຕັ້ງ​ປະຕິບັດ​ວຽກ​ງານພັດທະນາ​ເສດຖະກິດ-ສັງຄົມ ໃຫ້ມີ​ການ​ຂະຫຍາຍຕົວ​ຕໍ່​ເນື່ອງ ແລະ ຄວບ​ຄຸມ​ທົ່ວ​ປະເທດ ເຊິ່ງລະບົບ​ຄົມມະນາຄົມ​ທີ່​ດີ ແລະ ເຂົ້າ​ເຖິງໄດ້​ກາຍເປັນ​ປັດ​ໄຈ​ສຳຄັນ​ ໃນ​ການ​ສ້າງ​ສົມ​ດູນ​ການ​ຄ້າ ການ​ບໍລິການ ລວມ​ທັງ​ກະ​ຕຸ້ນການ​ລົງທຶນ​ທັງ​ພາຍ​ໃນ-ຕ່າງ​ປະເທດ​ໃຫ້​ນັບ​ມື້​ສູງ​ຂຶ້ນ ເຊິ່ງ​ຜ່ານການຈັດຕັ້ງ​ປະຕິບັດ​ການ​ແກ້​ໄຂ 18 ບັນຫາ​ຫຍໍ້ທໍ້​ທີ່​ພົ້ນ​ເດັ່ນ ພາຍໃຕ້​ຫົວຂໍ້ “ບຸກ​ທະລຸ​ການ​ແກ້​ໄຂບັນຫາ​ຫຍໍ້ທໍ້​ຂອງ​ຂະແໜງ ​ຍທຂ ຢ່າງ​ເປັນ​ລະບົບ” ໄລຍະ 2 ປີຜ່ານ​ມາ (2015-2016) ​ຍທຂ ສາມາດ​ແກ້​ໄຂ​ບັນຫາ​ພົ້ນ​ເດັ່ນຢ່າງ​ມີ​ປະສິດທິພາບ.

ຈາກ​ການ​ກວດກາ-ຄຸ້ມ​ຄອງລາຄາ​ຫົວໜ່ວຍ​ການ​ກໍ່ສ້າງ ​ຂອງບັນດາ​ໂຄງການ​ທີ່​ມີ​ຄວາມ​ຮັດກຸມ ໄດ້​ສາມາດ​ເຮັດ​ໃຫ້​ຫຼາຍໂຄງການ​ກໍ່ສ້າງ​ຂອງ​ລັດຖະບານ ມີ​ຄວາມ​ຖືກຕ້ອງ ແລະ ປະຢັດງົບປະມານ​ໄດ້​ສູງ​ສົມຄວນ ໂດຍສະເພາະແມ່ນ​ໂຄງການ​ກໍ່ສ້າງເສັ້ນທາງແຕ່​ທ່າ​ເຫຼົ້າ (ຊາຍແດນ ລາວ-ຫວຽດນາມ) ຫາເມືອງ​ຊຳ​ໃຕ້ ປະຢັດ​ງົບ​ໄດ້ 26,3 ລ້ານ​ໂດ​ລາ​ສະຫະລັດ ແລະ ສາມາດ​ສ້າງ​ທາງ​ໄດ້​ຕື່ມ 9,6 ກິ​ໂລແມັດ ກວດກາ​ດັດແກ້​ມູນ​ຄ່າການ​ກໍ່ສ້າງ​ເສັ້ນທາງ F1 ແຂວງຄຳ​ມ່ວນ ຫາ​ທາງ​ເລກ 9 ຄວາມຍາວ 167 ກິໂລແມັດ ສາມາດປະຢັດ​ງົບ​ໄດ້ 805,6 ຕື້​ກີບ ໂຄງການ​ກໍ່ສ້າງ​ເສັ້ນທາງ​ຊົນນະບົດຢູ່​ແຂວງ​ຈຳປາ​ສັກ ສາມາດ​ປະຢັດ​ງົບ​ໄດ້ 80 ຕື້​ກີບ ໂຄງການ​ກໍ່ສ້າງ​ທາງ​ແຕ່​ສາມ​ແຍກ​ສີ​ເກີດ-ຕານ​ມີ​ໄຊ ຍາວ 9 ກິໂລແມັດ ສາມາດ​ປະຢັດ​ງົບ​ໄດ້ 9,3 ລ້ານ​ໂດລາ​ສະຫະລັດ ຫຼື ປະມານ 73 ຕື້ກວ່າ​ກີບ ແລະ ໂຄງການ​ກໍ່ສ້າງຂົວ​ເບ​ຕົງ​ເສີມ​ເຫຼັກ ຈຳນວນ 7 ແຫ່ງ ຢູ່​ແຂວງ​ເຊ​ກອງ ສາມາດປະຢັດ​ງົບ​ໄດ້​ເຖິງ 40,2 ຕື້​ກີບ ພ້ອມ​ດຽວ​ກັນ​ນີ້ ຂະແໜງ ​ຍທຂ ຍັງ​ໄດ້​ເອົາໃຈໃສ່ຈັດ​ຕັ້ງ​ປະຕິບັດ​ວຽກ​ງານ​ແຜນການ-ການ​ເງິນ ສ້າງ​ວິໄນ​ແຜນການ-ການ​ເງິນ​ໃຫ້​ມີ​ຄວາມ​ເຂັ້ມແຂງ ສາມາດ​ກວດ​ສອບ​ໄດ້​ທຸກຂັ້ນ​ຕອນ ຄຽງ​ຄູ່​ກັບ​ການ​ຄຸ້ມຄອງ ແລະ ບໍລິການຂົນສົ່ງ​ທາງບົກ ເຊິ່ງ​ໃນ​ປີ 2016 ທົ່ວ​ປະເທດ ສາມາດ​ປະຕິບັດ​ການ​ຂົນສົ່ງໂດຍສານ​ໄດ້ 52,11 ລ້ານ​ເທື່ອຄົນ ຂົນສົ່ງ​ສິນຄ້າ 4,86 ລ້ານໂຕນ ການ​ຂົນສົ່ງ​ທາງນ້ຳ ໂດຍຜ່ານ​ທ່າເຮືອ 18 ແຫ່ງ​ທົ່ວ​ປະເທດ ສາມາດ​ຂົນສົ່ງ​ສິນຄ້າ​ໄດ້ 2,06 ລ້ານ​ໂຕນ ໂດຍສານ 1,67 ລ້ານເທື່ອ​ຄົນ ການ​ຂົນສົ່ງ​ທາງ​ອາກາດ​ສາມາດ​ຂົນສົ່ງ​ໂດຍສານທັງ​ພາຍ​ໃນ-ຕ່າງປະເທດ ໄດ້​ຈຳນວນ 1,07 ລ້ານ​ເທື່ອ​ຄົນ ແລະ ສິນຄ້າ 8.957 ໂຕນ ແລະ ວຽກງານ​ຂົນສົ່ງ​ທາງ​ລົດໄຟ ສາມາດປະຕິບັດ​ໄດ້ 32.248 ເທື່ອ​ຄົນ.

ໝາຍເຫດ: ທາງເວັບໄຊ້ທາງການພວກເຮົາ "devcrown.com" ກຳລັງຍ້າຍເຊີເວີ້ຢູ່ ອາດໃຊ້ເວລາຫຼາຍມື້ ເລີຍມາອັບເດດຂ່າວຜ່ານທາງເວັບໄຊ້ນີ້ຊົ່ວຄາວກ່ອນເດີ້ ^^

ຮຽບຮຽງ: devcrown.com ຄວາມຮູ້ທັນສະໄໝ
ຝາກ Like, share, comment ເພື່ອສະໜັບສະໜູນພວກເຮົາ ແລະ ຖ້າຍັງບໍ່ໄດ້ Like ເພຈ໌ເຟສບຸກ "devcrown.com ຄວາມຮູ້ທັນສະໄໝ", ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຄວາມຮູ້ທີ່ດີດີ.