ທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງ ຖວທ ໄດ້ຊີ້ແຈ້ງຕໍ່ກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ VIII ໃນອາທິດຜ່ານມານີ້ ວ່າ: ໃນປີ 2019 ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຕັ້ງເປົ້າຈະດຶງນັກທ່ອງທ່ຽວ ທັງພາຍໃນ ແລະ ຕ່າງປະເທດໃຫ້ເຂົ້າມາທ່ອງທ່ຽວຢູ່ ສປປ ລາວ ປະມານ 6 ລ້ານກວ່າຄົນ, ໂດຍຈະໄດ້ມີການສືບຕໍ່ ພັດທະນາຂະແໜງທ່ອງທ່ຽວ ໃຫ້ຫລາຍຂຶ້ນ ໂດຍຈະເນັ້ນໃສ່ ການພັດທະນາແຫລ່ງທ່ອງທ່ຽວ ແບບຍືນຍົງ ເຊັ່ນ: ທ່ອງທ່ຽວທາງທໍາມະຊາດ, ປະຫວັດສາດ ແລະ ວັດທະນະທໍາ, ເອົາໃຈໃສ່ໂຄສະນາເຜີຍແຜ່ ບັນດານິຕິກໍາໃຫ້ສັງຄົມຮັບຮູ້, ເຂົ້າໃຈຫລາຍຂຶ້ນ, ຊຸກຍູ້ຂະບວນການວັດທະນະທໍາ ສິລະປະພື້ນເມືອງ ໃນທົ່ວປະເທດຢ່າງຄຶກຄື້ນ.
ທ່ານ ບໍ່ແສງຄໍາ ວົງດາລາ ກ່າວຕື່ມອີກວ່າ: ໄລຍະເວລາຜ່ານມານີ້ ລັດຖະບານ ໄດ້ມີນະໂຍບາຍພັດທະນາ ແຫລ່ງທ່ອງທ່ຽວດ້ານຕ່າງໆ ເປັນຕົ້ນ ທາງດ້ານທໍາມະຊາດ, ປະຫວັດສາດ ແລະ ວັດທະນະທໍາ ເຊິ່ງແຫລ່ງທ່ອງທ່ຽວດັ່ງກ່າວ ໄດ້ມີຕົວເລກເພີ່ມຂຶ້ນ, ພື້ນຖານໂຄ່ງລ່າງທີ່ຮັບໃຊ້ ວຽກງານທ່ອງທ່ຽວ ກໍໄດ້ຮັບການພັດທະນາ ເປັນຈໍານວນຫລາຍ ທັງດ້ານປະລິມານ ແລະ ຄຸນນະພາບ ເຊີ່ງປະຈຸບັນ ພວກເຮົາມີໂຮງແຮມປະເພດຕ່າງໆ ປະມານ 540 ກວ່າແຫ່ງ, ເຮືອນພັກທຸກປະເພດປະມານ 2.000 ກວ່າແຫ່ງ, ຮ້ານບັນເທິງ 3.600 ກວ່າແຫ່ງ, ຮ້ານອາຫານ 3.900 ກວ່າແຫ່ງ. ໄປຄຽງຄູ່ກັນນີ້, ອາຫານລາວ ກໍຍັງໄດ້ຮັບ ຄວາມນິຍົມຊົມຊອບ ຈາກນັກທ່ອງທ່ຽວຫລາຍຂຶ້ນ. ພ້ອມນີ້, ລັດຖະບານ ກຳລັງສະເໜີພາກສ່ວນກ່ຽວ ຂ້ອງຂອງສາກົນ ຂຶ້ນທະບຽນມໍລະດົກໂລກ ທົ່ງໄຫຫີນ, ນອກນີ້ ພວກເຮົາຍັງໄດ້ສ້າງຂະບວນການ ສ້າງບ້ານວັດທະນະທໍາ, ຄອບຄົວວັດທະນະທໍາ, ສິລະປະພື້ນບ້ານໃຫ້ຫລາຍຂື້ນ ເພື່ອເປັນການດຶງດູດນັກທ່ອງທ່ຽວ ຈາກຕ່າງປະເທດ ໃຫ້ນັບມື້ນັບເພີ່ມຂຶ້ນ, ມາຮອດປີ 2016 ນີ້ ໄດ້ມີນັກທ່ອງທ່ຽວເຂົ້າມາ ປະເທດເຮົາຈໍານວນ 4 ລ້ານກວ່າຄົນ, ສ້າງລາຍຮັບ ໃຫ້ກັບປະເທດເຮົາເກືອບ 700 ລ້ານໂດລາສະຫະລັດ ເຊິ່ງນັບວ່າ ເປັນຈໍານວນບໍ່ໜ້ອຍ. ນອກຈາກນີ້, ເມືອງຫລວງພະບາງ ຍັງໄດ້ຮັບນາມມະຍົດ ເປັນເມືອງທີ່ໜ້າທ່ອງທ່ຽວທີ່ດີທີ່ສຸດ ຫລາຍປີຕິດຕໍ່ກັນ ຈາກວາລະສານ ທີ່ມີຊື່ສຽງຂອງສາກົນ.
ໝາຍເຫດ: ທາງເວັບໄຊ້ທາງການພວກເຮົາ "devcrown.com" ກຳລັງຍ້າຍເຊີເວີ້ຢູ່ ອາດໃຊ້ເວລາຫຼາຍມື້ ເລີຍມາອັບເດດຂ່າວຜ່ານທາງເວັບໄຊ້ນີ້ຊົ່ວຄາວກ່ອນເດີ້ ^^
ແຫຼ່ງຂ່າວ: KPL, ຮຽບຮຽງ: devcrown.com ຄວາມຮູ້ທັນສະໄໝ
ຝາກ Like, share, comment ເພື່ອສະໜັບສະໜູນພວກເຮົາ ແລະ ຖ້າຍັງບໍ່ໄດ້ Like ເພຈ໌ເຟສບຸກ "devcrown.com ຄວາມຮູ້ທັນສະໄໝ", ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຄວາມຮູ້ທີ່ດີດີ.
Comments
Post a Comment