ໃນວັນທີ 27 ເມສາ 2017 ນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ຊີ້ແຈ້ງຕໍ່ຂໍ້ຊັກຖາມ ແລະ ຂໍ້ສະເໜີ ຂອງບັນດາສະມາຊິກ ສະພາແຫ່ງຊາດ ຈາກເຂດເລືອກຕັ້ງຕ່າງໆ ກ່ຽວກັບວິທີການ ແລະ ມາດຕະການຄຸ້ມຄອງ ການເກັບລາຍຮັບ ຂອງກະຊວງການເງິນ ເພື່ອບໍ່ໃຫ້ມີການຮົ່ວໄຫລ ພ້ອມທັງສາມາດ ເກັບລາຍຮັບໄດ້ຄົບຖ້ວນ ຖືກຕ້ອງລະບຽບກົດໝາຍ ໃນກອງປະຊຸມ ສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ VIII.
ທ່ານ ສົມດີ ດວງດີ ໄດ້ຢືນຢັນວ່າ: ກ່ຽວກັບວິທີການ ແລະ ມາດຕະການຄຸ້ມຄອງ ການເກັບລາຍຮັບ ຂອງກະຊວງການເງິນ ເພື່ອບໍ່ໃຫ້ມີການຮົ່ວໄຫລ ພ້ອມທັງ ສາມາດເກັບລາຍຮັບ ໄດ້ຄົບຖ້ວນຖືກຕ້ອງ ລະບຽບກົດໝາຍນັ້ນ, ກະຊວງການເງິນ ໄດ້ສ້າງກົນໄກຊໍາລະ ພາສີ-ອາກອນ ໃຫ້ຜູ້ປະກອບການ ໄດ້ມີຫລາຍຊ່ອງທາງ, ສະດວກ, ຢຸດຕິໃຫ້ພະນັກງານ ຂະແໜງລາຍຮັບ ເກັບລາຍຮັບ ເປັນເງິນສົດນໍາຜູ້ປະກອບການ, ໂດຍກະຊວງການເງິນ ໄດ້ລິເລີ່ມ ພັດທະນາ ເຄື່ອງມືທັນສະໄໝ ເພື່ອອໍານວຍຄວາມສະດວກ ໃຫ້ແກ່ການເສຍພັນທະ ນັບແຕ່ ປີ 2016 ເປັນຕົ້ນມາ ເຊິ່ງຜູ້ປະກອບການ ສາມາດຊໍາລະຜ່ານລະບົບ Smart tax smart VAT ຢູ່ຕາມດ່ານ, ລະບົບຈ່າຍພັນທະອາກອນ ຜ່ານລະບົບທະນາຄານ, ປັດຈຸບັນ ກໍາລັງພັດທະນາ ອີກຫລາຍລະບົບ ເພື່ອອໍານວຍຄວາມສະດວກ ໃຫ້ແກ່ຜູ້ປະກອບການ ສາມາດຊໍາລະອາກອນ, ເສຍຄ່າທໍານຽມຕ່າງໆ ແລະ ເສຍຄ່າທາງ ລວມສູນເສຍບາດດຽວ ຜ່ານລະບົບ ATM ແລະ ຜ່ານໂທລະສັບມືຖື ເພື່ອຫລີກລjຽງບໍ່ໃຫ້ ພະນັກງານເກັບຕົວຈິງ. ທ່ານ ສົມດີ ດວງດີ ກ່າວຕື່ມວ່າ: ການຂະຫຍາຍຖານລາຍຮັບ ຈາກທີ່ເກັບກໍາຖານລາຍຮັບ ໄດ້ຊັດເຈນ, ມີລະບົບເສຍອາກອນ ຄົບຖ້ວນແລ້ວ ກະຊວງການເງິນ ຈະສຸມໃສ່ການປະເມີນ, ການວິເຄາະວິໄຈ ຖານຂໍ້ມູນນັ້ນ ເພື່ອເຮັດໃຫ້ ຜູ້ປະກອບການຊໍາລະພັນທະ ພາສີ-ອາກອນ ໃຫ້ລັດ ຖືກຕ້ອງສອດຄ່ອງກັບ ຕົວເລກລາຍຮັບທຸລະກິດ ທີ່ເຂົາເຈົ້າໄດ້ດໍາເນີນຕົວຈິງ. ອີກດ້ານໜຶ່ງທີ່ສໍາຄັນ ກໍາລັງຂະຫຍາຍຖານລາຍຮັບ ໂດຍໃຫ້ຜູ້ປະກອບການ ຖືບັນຊີຕາມກົດໝາຍ ແລະ ລະບຽບການ, ປະຕິບັດຊໍາລະອາກອນ ໃຫ້ຖືກຕ້ອງກັບຕົວຈິງ ເປັນຕົ້ນ ການຕັ້ງເຄື່ອງ, ການລົງທະບຽນເງິນສົດ ໃນບັນດາ ຫົວໜ່ວຍທຸລະກິດເຊັ່ນ: ໂຮງແຮມ, ຮ້ານອາຫານ, ຮ້ານຊັບພະສິນຄ້າ ແລະ ອື່ນໆ, ການສ້າງລະບົບຄຸ້ມຄອງ ຂໍ້ມູນຂ່າວສານ ທາງດ້ານລາຍຮັບໃຫ້ຄົບຊຸດ ປັດຈຸບັນ ກະຊວງການເງິນ ໄດ້ຮັບເງິນກູ້ຢືມ ແບບຜ່ອນຜັນຈາກ ສ ເກົາຫລີ ເຊິ່ງກໍາລັງດໍາເນີນການ ຄາດວ່າຈະໃຊ້ເວລາ 18-24 ເດືອນ ຈະສາມາດທົດລອງນໍາໃຊ້ ໃນປີ 2019 ນີ້.
ໝາຍເຫດ: ທາງເວັບໄຊ້ທາງການພວກເຮົາ "devcrown.com" ກຳລັງຍ້າຍເຊີເວີ້ຢູ່ ອາດໃຊ້ເວລາຫຼາຍມື້ ເລີຍມາອັບເດດຂ່າວຜ່ານທາງເວັບໄຊ້ນີ້ຊົ່ວຄາວກ່ອນເດີ້ ^^
ແຫລ່ງຂ່າວຈາກ: ຂປລ, ຮຽບຮຽງ: devcrown.com ຄວາມຮູ້ທັນສະໄໝ
ຝາກ Like, share, comment ເພື່ອສະໜັບສະໜູນພວກເຮົາ ແລະ ຖ້າຍັງບໍ່ໄດ້ Like ເພຈ໌ເຟສບຸກ "devcrown.com ຄວາມຮູ້ທັນສະໄໝ", ກະລຸນາ Like ໃຫ້ແນ່ເດີ້, ຊິບໍ່ໄດ້ພາດຄວາມຮູ້ທີ່ດີດີ.
Comments
Post a Comment