ເມື່ອທ້າຍອາທິດຜ່ານມາ ທ່ານ ຄຳພອນ ສີລາປະເສີດ ປະທານກຸ່ມເຮືອນຳທ່ຽວ ອ່າງນ້ຳງື່ມ ໄດ້ໃຫ້ສຳພາດ ຕໍ່ນັກຂ່າວພວກເຮົາວ່າ: ຢາກພັດທະນາ ກຸ່ມເຮືອນຳທ່ຽວອ່າງນ້ຳງື່ມ ໃຫ້ມີປະສິດທິພາບທີ່ດີ ຕ້ອງໄດ້ມີການປັບປຸງຈັດຕັ້ງ ເປັນກຸ່ມດຽວ ແລະ ອອກເປັນຄິວ, ທີ່ຜ່ານມາມີຄວາມສະດວກ ແລະ ຂໍ້ຫຍຸ້ງຍາກ ຫລາຍພໍສົມຄວນ, ພ້ອມນີ້ ມີແຂກພາຍໃນ ແລະ ຕ່າງປະເທດ ໃຫ້ຄວາມສົນໃຈ ມາທ່ອງທ່ຽວສະຖານ ທີ່ດັ່ງກ່າວເພີ່ມຂຶ້ນ ປະມານ 30% ທຽບໃສ່ປີຜ່ານມາ. ໄດ້ສ້າງລາຍຮັບມາສູ່ທຸລະກິດ ເຮືອນຳທ່ຽວເກືອບ 10 ລ້ານກີບຕໍ່ລຳຕໍ່ເດືອນ. ໃນຄະນະດຽວກັນ, ທາງກຸ່ມເຮືອນຳທ່ຽວສະເໜີ ໃຫ້ມີການຈັດສັນປັບປຸງ ສະຖານທີ່ຈອດລົດ ແກ່ລູກຄ້າ ໃຫ້ມີຄວາມສະດວກ ແລະ ຮັບປະກັນ ຄວາມປອດໄພຫລາຍຂຶ້ນກວ່າເກົ່າ.
ທ່ານ ຄຳພອນ ສີລາປະເສີດ ກ່າວວ່າ: ກຸ່ມເຮືອນຳທ່ຽວອ່າງນ້ຳງື່ມ ສ້າງຕັ້ງຂຶ້ນໃນປີ 2013, ເບື້ອງຕົ້ນມີເຮືອ ປະມານ 20 ລຳ, ໃນປັດຈຸບັນ ມີເຮືອນຳທ່ຽວທັງໝົດ 41 ລຳ, ໄດ້ແບ່ງອອກເປັນ 2 ໜ່ວຍບໍລິການ, ໂດຍມີຄວາມສະດວກ ແລະ ຂໍ້ຫຍຸ້ງຍາກພໍສົມຄວນ. ຂໍ້ສະດວກ ແມ່ນການຈັດເປັນກຸ່ມ ໂດຍມີເປົ້າໝາຍ ຮັບໃຊ້ບໍລິການແຂກ ແລະ ສາມາດຊ່ວຍເຫລືອກັນໄດ້ ໃນເວລາແຂກຫລາຍເຮືອບໍພໍ, ຜູ້ທີ່ມີທຸລະກິດນ້ອຍ ກໍສາມາດເຂົ້າມາຮ່ວມ ເຄື່ອນໄຫວບໍລິການໄດ້. ສ່ວນຂໍ້ເສຍ ເປັນການບໍລິການແຂກໃຜແຂກມັນ ແລະ ສົ່ງຜົນກະທົບ ຕໍ່ຜູ້ທີ່ບໍ່ມີທຸລະກິດ ຫລື ພຽງລໍຖ້າແຂກເຫລືອເທົ່ານັ້ນ, ຮ້າຍໄປກວ່ານັ້ນ ຍັງເກີດມີຄວາມຂັດແຍ້ງ ໃນກຸ່ມບໍລິການດ້ວຍກັນເອງ ແລະ ອີກບັນຫາໜຶ່ງ ທີ່ຖືວ່າຍັງແກ້ບໍ່ໄດ້ ແມ່ນເຮືອນຳທ່ຽວທຸກລຳ ບໍ່ສາມາດເຂົ້າໃກ້ລິສອດ ແດນສະຫວັນເດັດຂາດ ຖ້າເຂົ້າໃກ້ແມ່ນ ຈະຖືກປັບໄໝ 10.000-20.000 ບາດຕໍ່ຄັ້ັ້ງ.
ທ່ານ ຄຳພອນ ສີລາປະເສີດ ຍັງໄດ້ໃຫ້ຮູ້ຕື່ມວ່າ: ປັດຈຸບັນ ມີແຂກມາທ່ອງທ່ຽວຫລາຍຂຶ້ນ ເມື່ອທຽບໃສ່ ປີຜ່ານມາເຫັນວ່າ ໄດ້ເພີ່ມຂຶ້ນປະມານ 30%, ໃນຕໍ່ໜ້າ ເພື່ອຢາກໃຫ້ ການບໍລິການແຂກດີຂຶ້ນກວ່າເກົ່າ ຄວນຕ້ອງໄດ້ປັງປຸງເຮືອນຳທ່ຽວ ໃຫ້ເປັນໜ່ວຍດຽວກັນ ແລະ ຈັດເປັນຄີວບໍລິການແຂກ, ມີຫຍັງກໍລົມກັນ, ປຶກສາຫາລືຊ່ວຍເຫລືອ ຊຶ່ງກັນ ແລະ ກັນ. ສຳລັບເຮືອນຳທ່ຽວ ມີ 3 ລາຄາ ຄື 1 ແສນ, 1,5 ແລະ 2 ແສນກີບຕໍ່ຖ້ຽວ. ການບໍລິການເຮືອນຳທ່ຽວ ອ່າງນ້ຳງື່ມເປັນທຸລະກິດໜຶ່ງ ທີ່ສຳຄັນ ນອກຈາກເປັນການສ້າງລາຍຮັບ ໃຫ້ແກ່ທຸລະກິດ ກໍຄື ຜູ້ປະກອບການແລ້ວ ຍັງໄດ້ປະກອບສ່ວນ ຈ່າຍພັນທະອາກອນ ໃຫ້ລັດ ແລະ ອາກອນມູນຄ່າເພີ່ມ 10% ຕື່ມອີກ.
ໝາຍເຫດ: ທາງເວັບໄຊ້ທາງການພວກເຮົາ "devcrown.com" ກຳລັງຍ້າຍເຊີເວີ້ຢູ່ ອາດໃຊ້ເວລາຫຼາຍມື້ ເລີຍມາອັບເດດຂ່າວຜ່ານທາງເວັບໄຊ້ນີ້ຊົ່ວຄາວກ່ອນເດີ້ ^^
ຂອບໃຈແຫຼ່ງຂ່າວຈາກ: ປະເທດລາວ, ຮຽບຮຽງ: devcrown.com ຄວາມຮູ້ທັນສະໄໝ
Comments
Post a Comment